آدابِ طعام

رسول اکرم ﷺ نے فرمایا۔

بسم اللہ پڑھ کر کھانا کھاؤ اور دائیں ہاتھ سے کھاؤ اور اپنے سامنے سے کھاؤ۔

حضرت عمرو بن ابی سلمہؓ ۔۔ ترمذی۔ابواب الاطعمہ۔ح۔1690۔ض۔51

جب دسترخوان بچھایا جائے تو کوئی شخص اُس پر سے اُس وقت تک نہ اُٹھے جب تک کہ دسترخوان نہ اُٹھا لیا جائے۔ اگر کسی کا پیٹ بھر بھی گیا ہو تو وہ اُس وقت تک کھانے سے ہاتھ نہ اُٹھائے جب تک کہ سب لوگ فارغ نہ ہو جائیں۔ اگر کوئی اپنے ساتھیوں کو کھانا کھاتے ہوئے چھوڑ کر کھڑا ہو جائے تو معذرت کر لے کیونکہ اُس کا سب سے پہلے کھانے سے ہاتھ روک لینا اور کھڑے ہو جانا ساتھیوں کے لیے شرمندگی اور خجالت کا باعث بنتا ہے۔ ممکن ہے کسی کو ابھی کھانے کی طلب ہو۔

حضرت عبداللہ بن عمرؓ ۔۔ ابنِ ماجہ۔کتاب الاطعمہ۔ح۔3295

لوگو! مل کر کھانا کھایا کرو کیونکہ برکت جماعت کے ساتھ ہے۔

حضرت عمر فاروقؓ ۔۔ ابن ماجہ۔کتاب الاطعمہ۔ح۔3287

حضرت انسؓ کی روایت سے معلوم ہوتا ہے کہ نبی کریم علیہ الصلوٰۃ والسلام اطمینان کے ساتھ اور ٹھہر ٹھہر کر پانی نوش فرماتے تھے اور اس دوران تین مرتبہ سانس لیا کرتے تھے۔

حضرت انسؓ ۔۔ بخاری۔کتاب الاشربۃ۔ ح۔5631

تین سانس میں پانی زیادہ سیراب کرنے والا زیادہ صحت بخش اور زود ہضم ہے۔

حضرت انسؓ ۔۔ مسلم۔کتاب الاشربۃ۔ح۔5287

حضرت انسؓ فرماتے ہیں کہ

نبی کریم ﷺ نے کھڑے ہو کر پانی پینے سے منع فرمایا ہے۔

حضرت انسؓ ۔۔ مسلم۔کتاب الاشربۃ۔ح۔5274

جب تم میں سے کوئی کھانا کھائے تو کہے

اے اللہ ! اِس کھانے میں برکت عطا کر اور اس سے بہتر کھلا

اور دودھ پیے تو کہے اے اللہ! اِس میں برکت عطا فرما اور اس سے زیادہ پہنچا

حضرت عبداللہ ابن عباسؓ ۔۔ ابی داؤد۔کتاب الاشربۃ۔ح۔3727