Topics
ایک سورج جس سے روشن تھا ولایت کا چمن
ایک عارف دین کی تبلیغ تھا جس کا مشن
اِک قلندر جس نے ذہنوں کو عطا کی روشنی
ایک عالم جس نے سمجھائے رموز ِ آگہی
اک ولی جس سے دلوں کو کیفِ روحانی ملا
حق کا ابدال ، پیکر جس کو انسانی ملا
اِک منارہ نور کا جو روشنی دیتا رہا
ناخدا تھا اِک سفینہ حق کا جو بہتا رہا
ایک صوفی جس پہ ظاہر رشتہ روح و بدن
اِک امیرِ بے نوا دولت تھی جس کی اُس کا مَن
اِک چراغِ حق ، جلائے جس نے حکمت کے چراغ
اِک مہِ کامل ، مٹائے جس نے تاریکی کے داغ
ایک شخصیت نہیں تاریخ میں جس کی مثال
صاحبِ ادراک و صاحب ِ کشف و کمال
کون ہے وہ شخص حامل ہے جو اِن اوصاف کا
میرا مطلب ہے ، مرے بابا قلندر اولیاء ؒ
